Cafodd Menter Cwm Gwendraeth ei chanmol am ei Gwasanaeth Min Nos sy’n helpu cleifion i adael yr ysbyty a dychwelyd i’r gymuned. Mae tîm o ymchwilwyr o Brifysgol Bangor wedi rhoi clod i’r gwasanaeth cludiant ysbyty fel esiampl o arfer da. Gweithredwyd y gwasanaeth o 2pm i 10pm o Ddydd Iau i Ddydd Llun, yn cynnig cludiant car am ddim o adrannau damwain ac argyfwng yn ysbytai’r Tywysog Phillip a Glangwili ar gyfer cleifion sy’n agored i niwed. Amcangyfrifwyd gan ymchwilwyr fod y gwasanaeth yn arbed o leiaf 20 dydd gwely y mis gydag arbedion o £363 y dydd. Mae’r gwasanaeth yn helpu i osgoi derbyniadau diangen i’r ysbyty trwy ddarparu cymorth gofal cymdeithasol i helpu pobl i setlo nôl gartref – byddai cleifion fel arall yn cael eu rhoi mewn ward heb unrhyw angen meddygol.

Yn ogystal a gweld pobl yn ddiogel gartref o’r ysbyty, mae gwirfoddolwyr Menter Min Nos hefyd yn helpu pobl trwy droi goleuadau a gwres ymlaen, paratoi lluniaeth ar eu cyfer, dod i mewn â  cyflenwadau o fwyd a gwneud gwiriadau sylfaenol diogelwch yn y cartref. Maent hefyd yn cyfeirio at wasanaethau gofal cymdeithasol arall ac yn cynnig cwmni o fewn i’r ysbyty. Er bod y cynllun yn cael ei redeg gan Menter Cwm Gwendraeth, o’r dechrau mae e wedi bod yn bartneriaeth, gyda’r syniad o’r cynllun yn dod o’r Bartneriaeth Iechyd, Gofal Cymdeithasol a Lles Sir Gaerfyrddin sydd yn dod â mudiadau’r trydydd sector, iechyd a gofal cymdeithasol at eu gilydd.

Dywedodd David Saywell, Cydlynydd Dolen Iechyd Menter Cwm Gwendraeth “Mae Menter Min Nos wedi mynd o nerth i nerth. “Mae yna amrywiaeth o dystiolaeth i awgrymu y byddai nifer o ddefnyddwyr y gwasanaeth yn aros yn yr ysbyty am fwy nag un nos os byddent yn cael eu derbyn fel claf preswyl. Yn ogystal â hyn, y sylwadau cadarnhaol rydym yn cael o ddefnyddwyr y gwasanaeth sydd yn wir  y gwneud y gwahaniaeth i ni. Dywedodd Deris Williams, cyfarwyddwr Menter Cwm Gwendraeth “Rydw i wrth fy modd ein bod gallu gweithio mewn partneriaeth i ddarparu’r gwasanaeth mawr ei angen yma.” Ychwanegodd Peter Llewellyn, Pennaeth Partneriaethau Strategol ym Mwrdd iechyd Hywel Dda: “Mae’r gwasanaeth yn nodweddiadol o’r daioni mae cydweithio yn rhoi i’r gymuned ac mae’r gwerthusiad hyn yn amlinellu yn glir ei effeithiolrwydd yn cefnogi darpariaeth Gofal Cymdeithasol ac Iechyd yn Sir Gaerfyrddin.”

Comisiynwyd yr adroddiad gan Gyngor Gweithredu Gwirfoddol Cymru ac ariannwyd gan Llywodraeth Cynulliad Cymru.